“O espantallo amigo” de Xosé Neira Vilas chega mañá a Vilagarcía

O proxecto teatral e literario ideado por Os Quinquilláns e Editorial Galaxia a partir do “Espantallo Amigo” de Xosé Neira Vilas chega ao Auditorio Municipal Vilagarcía de Arousa mañá mércores 27 de xaneiro. Celebraranse dúas sesións, ás que acudirán medio milleiro de nenos e nenas de cinco centros de ensino do concello: CEIP de A Lomba, CEIP Rosalía de Castro de Carril, CEIP Vilaxoán, CEIP Rubiáns e CEIP Piñeiriño. Este clásico da literatura infantil galega que xa viaxou polos teatros de medio mundo aterra agora de novo nos escenarios galegos, acompañada dunha edición especial do libro que lle dá orixe.

A historia de xenerosidade ideada por Xosé Neira Vilas está contada, na versión teatral de Lucho Penabade e Tero Rodríguez, polos nenos que no seu día conseguiron superar a miseria grazas á xenerosidade do espantallo amigo e que, xa convertidos en home e muller, queren facer unha montaxe teatral que explique o sucedido. Acompaña a representación teatral unha versión impresa ilustrada por Xaquín Marín que o público leva consigo, para continuar os momentos de risa e reflexión vividos no patio de butacas coa lectura demorada na casa.

O proxecto ofrece un traballo transversal que lles permite aos espectadores-lectores comprender as relacións entre as distintas linguaxes artísticas e que colleitou un grande interese entre o profesorado galego.

Sinopse

Espantallo nace para o vello oficio asignado a todos os da súa especie: escorrentar as aves que ameazan con estragar a colleita de froita do ano. Pero maila ser un espantallo como calquera outro (coa súa chaqueta de remendos, a súa cabeza de cabaza e o seu corpo de palla), Espantallo ten corazón. Certo que cando o fixeron lle puxeron un corazón de pexego, pero axiña vai demostrar que a súa bondade e sentido da amizade non teñen límites.

O autor

Xosé Neira Vilas (Gres-Vila de Cruces, 1928-2015) emigra en 1949 a Bos Aires, onde desempeña traballos diversos e desenvolve un intenso activismo cultural. Secretario Xeral das Mocedades Galeguistas e co-director do periódico Adiante, coa súa muller, a escritora cubana Anisia Miranda fundou a librería-editorial Follas Novas. Publicou, en 1960, o poemario Dende lonxe e, en 1961, a novela Memorias dun neno labrego. Nese mesmo ano trasladouse a Cuba. En 1969 fundou a Sección Galega do Instituto de Literatura e Lingüística (1969). Sobre a presenza da emigración galega en América publicou diversos libros. Ata a súa recente morte, residiu en Gres, a súa aldea natal en Vila de Cruces, dende onde presidía a Fundación Xosé Neira Vilas. Foi membro da Real Academia Galega e recibiu numerosos galardóns.