O conselleiro de Sanidade di que se aliaron situacións que non son habituais na morte súbita dunha muller no acceso do HAC

O conselleiro de Sanidade, Jesús Vázquez Almuíña, admitiu este venres que “se aliaron situacións que non son habituais” nas circunstancias que rodearon o falecemento dunha muller de 49 anos, a primeira hora da mañá do xoves, nun corredor da zona de acceso principal do Hospital Álvaro Cunqueiro (HAC) de Vigo.

En declaracións aos medios, o conselleiro recordou que a muller acudía sobre as 6.30 horas da mañá a visitar un familiar e que entrou pola porta principal do edificio. Aínda que noutros centros hospitalarios se pechan os accesos principais de noite, iso non acontece no HAC debido a que suporía un “trastorno enorme” para os visitantes, que deberían percorrer longas distancias dende Urxencias ata a zona de hospitalización, nun complexo de 190.000 metros cadrados.

Segundo explicou o conselleiro, no momento en que esa señora se esvaeceu no HAC non había ninguén na zona de acceso, porque coincidiu coa hora en que se van uns traballadores e chegan outros. “O espazo é grande e iso pode acontecer, nese corredor, pero tamén na avenida principal da entrada, non hai cobertura total”, sinalou.

Vázquez Almuíña evitou dar detalles sobre o tempo que estivo a muller soa ata que foi atopada e se deu a voz de alarma, o que si subliñou é que o persoal sanitario acudiu na súa axuda “urxentemente” tan pronto como “tivo coñecemento” do que pasara. Nese sentido, lamentou que os profesionais do hospital non puideron facer nada por salvalo a vida porque “non había posibilidade de reanimación”.

Por outra banda, chamou a evitar as “especulacións” porque hai unha investigación xudicial en marcha, e deberá ser o xulgado, analizando as gravacións, informes médicos e autopsia, que determine as circunstancias deste suceso.

PROXECTO DE ATENCIÓN A MORTE SÚBITA

O conselleiro aproveitou as súas declaracións para recordar que a Xunta planea poñer en marcha un proxecto para a prevención da morte súbita, e que Galicia é unha das poucas comunidades autónomas que ten un rexistro de decesos por morte súbita a través do 061.

Unha vez que feito o rexistro e analizada a “incidencia real” deste fenómeno, que “adoita darse en ámbitos extrahospitalarios”, a Xunta poderá tomar medidas. Así, recordou un exemplo que xa funciona en moitos municipios galegos, como é a instalación de desfibrilador en edificios públicos.