O Concello de Pontevedra considera a prórroga a Ence unha malísima noticia

A alcaldesa en funcións de Pontevedra, Carme da Silva, cualificou como “unha malísima noticia” a decisión do Ministerio de Medio de outorgar á empresa Ence a prórroga da concesión de ocupación dos terreos nos que se sitúa o seu Centro de Operacións na Ría de Pontevedra, algo que, lamentou, “condicionará o futuro para as próximas xeracións”.

“É unha decisión que vai condicionar o futuro de varias xeracións de cidadáns en toda a bisbarra”, sinalou Da Silva, que engadiu que “vai imposibilitar a recuperación da ría” en 60 anos”.

Segundo a alcaldesa en funcións, o goberno local de Pontevedra “vai traballar con todas as medidas ao seu alcance para que non se perpetre este atentado contra a ría e contra os galegos en xeral”.

Dado que non coñece os pormenores da información, Da Silva asegurou que esperará a “coñecer todos os detalles da decisión por parte do Ministerio” para que os técnicos traballen sobre ela e decidir o próximo paso a seguir.

Para esta tarde, o concello convocou unha rolda de prensa na que membros do goberno local comparecerán xunto á Plataforma ‘Ence Non!’, a Federación de Asociacións de veciños Castelao e a Asociación pola Defensa dá Ría (APDR) para valorar “a peor noticia” que podían esperar, segundo palabras da concelleira Da Silva.

“Esta é a herdanza de Mariano Rajoy, regalarlle miles de millóns a Ence durante 60 anos, eles saberán a cambio de que o fan”, declarou a alcaldesa en funcións.