Facultativos do Complexo Hospitalario Universitario de Pontevedra imparten un curso de reanimación cardiopulmonar avanzada

Facultativos da UCI (unidade de coidados intensivos) do Complexo Hospitalario Universitario de Pontevedra, coordinados polo doutor José Luís Martínez Melgar e pola Comisión de Docencia do Complexo pontevedrés -que dirixe o doutor Cristóbal Galbán- imparten no hospital Montecelo durante a presente e a vindeira semana e en horario de tarde, a 14ª edición do Curso de Reanimación Cardiopulmonar Avanzada.

Esta actividade docente conta co aval do Plan Nacional de Reanimación Cardiopulmonar e a Sociedade Española de Medicina Intensiva, Críticos e Unidades Coronarias (Semicyuc) e a European Resucitation Council (ERC), e vai dirixida a 32 facultativos internos residentes -MIR- que se forman na área de Xestión Integrada de Pontevedra e O Salnés. Nesta 14ª edición do curso impártense clases teórico-prácticas relacionadas co soporte vital avanzado que reciben os pacientes en situación de parada cardiorrespiratoria.

Así, dende a tarde do pasado luns 18 de xaneiro, o Curso de Reanimación Cardiopulmonar Avanzada está a analizar protocolos de actuación e cadros patolóxicos que presentan os pacientes en diversas situacións críticas, dacordo coas recomendacións da European Resucitation Council (ERC)recentemente publicadas en outubro de 2015. 

Simulación práctica de casos

O Curso de Reanimación Cardiopulmonar Avanzada tamén está a efectuar ao longo desta semana numerosas simulacións prácticas interactivas, que analizan as atencións iniciais a pacientes con patoloxías críticas. 

Así mesmo, o programa deste curso incide no estudo e aplicación interactiva por parte dos facultativos internos residentes doutros protocolos asistenciais efectuados a pacientes con síndromes coronarios agudos e situacións especiais do doente crítico. 

Esta actividade docente rematará o vindeiro venres 22 de xaneiro na súa primeira edición no hospital Montecelo, cunha avaliación global teórica e práctica polos facultativos docentes, que se complementará coa execución de novas simulacións de casos efectuadas polos médicos internos residentes, nas que se supervisará a eficacia e calidade das técnicas aplicadas. O hospital Montecelo celebrará unha segunda edición deste curso a semana dos vindeiros 25 ao 29 de xaneiro.