Efectivos policiais blindan o mercado de Santiago tras a liorta entre clans xitanos

Mercado de Santiago

Efectivos de Policía Nacional e de Policía Local incrementaron a súa presenza dende primeira hora deste xoves no mercado de Santiago para evitar que se reproduzan incidentes como o que a cidade viviu o pasado sábado, cando unha liorta entre clans xitanos acabou cun tiroteo.

Efectivos da Policía Nacional fixeron acto de presenza na explanada de Salgueiriños antes das 9.00 horas da mañá, coa chegada das primeiras furgonetas dos vendedores.

De feito, mentres os comerciantes montaban os primeiros postos baixo a chuvia, na zona xa vixiaban dúas dotacións da Policía Nacional, unha delas cunha furgoneta.

A este dispositivo sumouse tamén a Policía Local, que habitualmente patrulla cunha dotación o mercado, pero que este xoves incrementará o número de efectivos para evitar tensións, dado que as familias implicadas na liorta do sábado participan neste mercado.

TENSIÓN PUNTUAL

A primeira hora, os vendedores aproveitaban os últimos minutos antes de iniciar o mercado nas cafetarías próximas á explanada de Salgueiriños, onde o tiroteo do sábado era un dos motivos de conversación. Non obstante, algúns comerciantes restaron importancia á liorta, considerando que se tratou dun momento de tensión puntual.

Os servizos de intermediación municipais traballan coas familias implicadas na pelexa do sábado para evitar que se reproduzan conflitos entre elas. Con esta actuación, o concelleiro de Convivencia, Xan Duro, considerou improbable que a tensión chegue ao mercado, xa que a orixe está nunha disputa “privada” entre ambos os dous clans.

A Policía Nacional informou este martes de que a orixe da liorta, que se saldou con catro feridos, está nun xuízo pendente por unha denuncia por agresión entre estas familias.