Dúas persoas resultan afectadas en Touro pola mala combustión dunha cociña de butano

Os servizos sanitarios trasladaron a última hora deste domingo a dúas persoas afectadas por inhalación do gas que, probablemente, desprenderon as bombonas dunha cociña de butano por mala combustión. Segundo informou a Central de Atención a Emerxencias 112-Galicia, o suceso aconteceu pasadas as 20.00 horas deste domingo nunha vivenda situada no lugar de Laña de Abaixo, na parroquia de Quión.

Ata o lugar do suceso desprazáronse, ademais de persoal sanitario, os Bombeiros de Arzúa e o persoal da empresa subministradora. Tamén foron informados a Garda Civil e Protección Civil de Touro. Os afectados foron trasladados a un centro sanitario.