Deteñen en Santiago a un xoven con máis de 20 reclamacións xudiciais pendentes

A Policía Nacional detivo o pasado domingo en Santiago de Compostela a un mozo de 30 anos con máis de 20 reclamacións xudiciais pendentes de distintos puntos de España por delitos de estafa a través de Internet.

Segundo informou o Corpo, a detención produciuse a primeira hora da tarde, cando o mozo foi identificado mentres se atopaba nun centro comercial da cidade.

Ao detido cónstanlle seis reclamacións en vigor para a súa detención ditadas por xulgados de Avilés, Guadalajara, Palencia, Salamanca, Viella e Santiago; sete reclamacións policiais de localidades como Benidorm, Madrid ou Cáceres; e 13 ordes de indagación de paradoiro ditadas dende Bilbao, Vigo, Toledo ou Zaragoza.

A maior parte das reclamacións proceden da presunta autoría de múltiples delitos de estafa a través de Internet. Segundo os datos da Policía, o mozo poñía en venda aparatos electrónicos como tablets, ordenadores portátiles ou televisores que nunca eran recibidos polos seus compradores.

O detido, ao que lle constan antecedentes previos por feitos similares, foi posto a disposición do xulgado de garda, que decretou o seu ingreso en prisión.