Declara o menor do caso ‘Jimmy’ despois de ser ameazado por dous membros do Frente Atlético

O menor acusado de participar na morte do siareiro do Deportivo Francisco Javier Romero, alcume ‘Jimmy’, acudiu este luns a declarar ao Xulgado de Menores número 4 de Madrid despois de que dous membros da Frente Atlético fosen detidos este sábado tras ameazalo.

Os dous acusados de ameazar a testemuña protexida foron enviados a prisión provisional para protexer a vítima e que puidese declarar este luns na vista oral do xuízo.

Segundo informaron fontes xurídicas, o maxistrado do Xulgado de Instrución número 4 de Madrid, en función de garda de detidos, acordou a prisión provisional de Pedro M. M. e Jesús F. P., e serán investigados de forma separada acusados dun delito contra a administración da Xustiza e outro delito de ameazas.

A Fiscalía pide once anos de reclusión para o menor pola súa presunta participación nos feitos. Segundo o Ministerio Fiscal, o menor, A.C.G., é autor dos delitos de rifa tumultuaria e homicidio ao golpear a ‘Jimmy’ cunha defensa extensible na zona abdominal e que “con ánimo de causarlle a morte, continuou propinándolle golpes axudado por outros maiores de idade”.

Foi o pasado xullo cando esta testemuña protexida menor de idade identificou catro persoas como os autores da morte do ultra galego. No seu testemuño, a testemuña corroboraba en gran parte a tese policial dos feitos. Segundo fontes da investigación, entre os sinalados por este menor, estaban dous dos catro que foron detidos no seu día polo presunto asasinato e que o pasado maio foron postos en liberdade por falta de probas.