Club de Empresas Obradoiro, medios e peñas loitarán polo IV Torneo ProAm

O Rio Natura Monbus Obradoiro celebrará o vindeiro mércores 27 ás 19:30 horas a cuarta edición do Torneo ProAm, un dos eventos máis lonxevos e divertidos do Club de Empresas Obradoiro. 

Este campionato cuadrangular reunirá aos equipos formado por patrocinadores, medios de comunicación e peñistas do club, xunto aos xogadores do primeiro persoal do equipo que compite na liga Endesa. Todos os participantes deixarán de lado o seu rol habitual durante unhas horas para vestirse de curto e demostrar as súas habilidades na pista.

O desafío disputarase co formato de 5X5, con dúas semifinais e final para decidir o triunfador da competición. Cada un dos catro equipos participantes realizará entre dúas e tres fichaxes dos profesionais, dos cales só dous poderán estar en pista simultaneamente.

Á conclusión de Torneo farase a entrega de trofeos antes de pasar ao catering ofrecido por Airas Catering. De novo, o evento terá tamén a colaboración doutras moitas empresas do Club de Empresas Obradoiro, máis amplo cada día. É o caso de Vive, Enfios Texgroup, Estrella Galicia, Air Hostess, CEGA Audiovisuais, Xoiaría Jael, Cabreiroá e a Federación Galega de Baloncesto.