Caballero eloxia a reactivación do aeroporto de Peinador a pesar da “competencia desleal” na Eurorrexión

O alcalde de Vigo, Abel Caballero, eloxiou a “reactivación” do aeroporto de Peinador polo crecemento de case un cinco por cento no número de pasaxeiros que rexistrou en 2015, a pesar das “axudas que van contra a competencia” na área da Eurorrexión, en referencia a O Porto, Santiago e A Coruña.

Así o comunicou en declaracións aos medios despois de que Aena publicase este martes as estatísticas dos aeroportos relativas ao ano 2015, a colación das que Caballero manifestou que o crecemento de Vigo é “significativo”, reflicte a súa “reactivación” e continúa a senda de 2014, cando xa se freou a caída”.

O mandatario vigués destacou que a ruta a Madrid “se fortalece”, que o obxectivo agora é “fortalecer” a ruta a Barcelona e consolidar os novos voos e compañías. “Estamos a fixar o aeroporto de Vigo na liña que corresponde”, sinalou, antes de subliñar que esta terminal “ten boa saúde e longa vida”.

Neste contexto, apuntou que estas cifras se conseguiron a pesar de que Peinador ten “competencia desleal desde Santiago e A Coruña, financiados pola Xunta, e desde O Porto”. “O aeroporto de Vigo xa o financiamos nós e no futuro incorporarase, confío, a Deputación de Pontevedra”, rematou.