Besteiro chega aos xulgados de Lugo sen a compañía dos seus avogados

O secretario xeral do PSdeG, José Ramón Gómez Besteiro, chegou esta mañá aos xulgados de Lugo, onde estaba convocado pola instrutora do caso do Garañón, Pilar de Lara, sen a compañía dos seus avogados, que se atopan nun xuízo en Málaga dende o luns.

Fíxoo a falta duns minutos para as 10,00 horas, o momento no que fora citado, mentres que De Lara non entrou no edificio xudicial ata as 10,05 horas.

Á súa entrada, o xefe de filas dos socialistas galegos non quixo falar cos xornalistas, e pospuxo calquera declaración á súa saída do despacho da xuíza.

Besteiro está imputado por un delito contra a ordenación do territorio, suborno, prevaricación e tráfico de influencias nun caso procedente da súa etapa como concelleiro de Urbanismo en Lugo ás ordes do exalcalde Xosé López Orozco, hai máis de 10 anos.