As cegoñas de Teixeiro cambian de dirección
Desde hai dous anos, unha parella de cegoñas aniña en Teixeiro. A pesar de que esta zona non é habitual nas migracións destas aves, as cegoñas elixiron para construír o seu refuxio un guindastre dun edificio a medio terminar situado na Avenida de Buenos Aires. Con todo, desde hoxe teñen un novo fogar na área de lecer do Penedo, a cen metros do seu antigo domicilio, onde o Concello de Curtis levantou unha estrutura adaptada e preparou o seu niño para poder retirar o guindastre e protexer aos animais.
O cambio de niño, que foi seguido con interese polo alcalde Javier Caínzos e o concelleiro de servizos Emilio Souto, efectuouse seguindo as directrices e o protocolo marcados pola consellería de Medio Ambiente e o Centro de Recuperación da Fauna da Xunta de Galicia sito en Oleiros. Ademais dos operarios municipais, acudiron os xefes do Servizo de Biodiversidade da Xunta e do servizo de Conservación da Natureza da Coruña, un axente ambiental da zona e un técnico do Centro de Recuperación.
Unha vez preparado o novo niño, unha das cegoñas non tardou nin media hora en localizalo e instalarse, rapidez que sorprendeu aos especialistas que estaban presentes. O axente ambiental explicou que nunca vira tan pronta adaptación no seu distrito forestal.
Sobre o guindastre colocáronse elementos para impedir que as cegoñas volvan aniñar. O Goberno local xa instara ao construtor a que retirase o guindastre por motivos de seguridade e espera que o faga nos próximos días. De non ser así, será o Concello o que proceda á súa retirada e pasaralle os custos.