Ana Pastor di que Fomento continuará apoiando ás vítimas do Alvia tras o peche da instrución

A ministra de Fomento en funcións, Ana Pastor, mostrou o seu respecto á decisión do titular do Xulgado de Instrución número 3 de Santiago, Andrés Lago Louro, de proceder ao peche da instrución polo accidente do tren Alvia, tras desestimar todos os recursos.

A preguntas dos xornalistas, evitou pronunciarse sobre a decisión de desestimar os recursos presentados por vítimas e familiares de falecidos polo accidente acontecido en xullo de 2013 no barrio compostelano de Angrois e no que morreron 80 persoas. Así, unicamente mostrou o seu “respecto” á decisión xudicial. Mentres, dixo que a vontade do Ministerio de Fomento é “seguir apoiando” as vítimas.

A ministra de Fomento en funcións realizou estas manifestacións tras presentar o balance de Salvamento Marítimo o ano pasado.