A Xunta defende a prórroga “regulada” a ENCE

O director xeral de Enerxía e Minas, Ángel Bernardo Tahoces, defendeu a prórroga de 60 anos á concesión de ENCE na ría de Pontevedra decidida polo Goberno en funcións do Partido Popular, a través do Ministerio de Agricultura, Alimentación e Medio Ambiente, para apuntar que “á Xunta de Galicia o que queda, naturalmente, é respectar esa resolución, ditada no seo dun procedemento administrativo absolutamente regulado”.

“Os tempos son do Ministerio de Agricultura e as competencias son do Ministerio de Agricultura”, contestou Tahoces a preguntas da prensa este martes sobre esta cuestión.

Así, Tahoces apuntou que esta “é unha resolución administrativa” que foi “instruída e resolta polo Ministerio de Medio Ambiente”, “completamente regulada”. Sobre o papel do Goberno galego, limitouse a sinalar que “a Xunta interveu no seu momento emitindo o informe ambiental correspondente e solicitado”.

Ademais, garantiu que “a Xunta terá que velar polos compromisos adquiridos” por ENCE de “investimentos no campo ambiental, tecnolóxico e paisaxístico”.

“A Xunta de Galicia traballará arreo para que eses investimentos sexan acrecentados e incrementadas en beneficio de todos os galegos e, moi particularmente, en beneficio dos pontevedreses”, asegurou o responsable de Enerxía.

Sobre o anuncio do Concello de Pontevedra e outros colectivos de recorrer esta decisión, Tahoces indicou que “cada quen pode facer as valoracións que estime oportunas, o ordenamento aí está aberto para que toda persoa póidao utilizar”, pero afirmou que esa prórroga se concede “con pleno sometemento ao ordenamento xurídico”.