A Ximnástica xa coñece os rivais para a primeira xornada da División de Honra 2016

O equipo masculino da Sociedade Ximnástica enfrontarase ao Maratón de Madrid, Vino Toro de Zamora e Unicaja de Jaén, o próximo 30 de abril. Estes son os rivais cos que decidiu emparellar a Comisión de Clubs da RFEA, na súa reunión do pasado fin de semana, queda pendente de pechar a sede do encontro, pero a priori a opción máis crible sinala á comunidade madrileña.

Analizando os antecedentes con estes rivais da Ximnástica, será complicado conseguir a segunda praza do encontro; o Maratón de Madrid, que leva cinco tempadas consecutivas sendo o terceiro do Campionato, é o claro favorito a gañar o encontro, ademais converterase no equipo que máis veces se enfrontou coa Ximnástica, será a novena vez; o Unicaja Jaén, nos dous últimos anos meteuse na Final da competición, aínda que baixou algo as súas prestacións será un duro rival para a Ximnástica, xa que o ano pasado gañoulle ao equipo pontevedrés na segunda xornada, o que abocou á escuadra de Ramón Touza a ir á Final por evitar o descenso.

O Viño Toro é o equipo máis débil dos 4, raro será non velo na última posición do encontro, recentemente ascendido, aínda que non debuta na categoría xa que o fixo en 2014, o seu obxectivo pasa por rabuñar puntos decisivos para manter a categoría e non converterse no típico equipo ascensor.

Haberá que esperar uns días a que a RFEA confirme de maneira oficial a sede e todos os enfrontamentos da primeira xornada.