A xestión da Atención Primaria na EOXI de Pontevedra e O Salnés recibe un premio á excelencia en calidade

A xestión e organización da Atención Primaria na EOXI de Pontevedra e O Salnés ven de recibir un recoñecemento sanitario nacional, a través do Premio Sanitario 2016 á Excelencia en Calidade, otorgado pola Fundación Avedis Donabedian, un dos galardóns máis prestixiosos no ámbito sanitario. O xerente de Xestión Integrada de Pontevedra e O Salnés, Jose Manuel González Álvarez, recolleu este premio nun acto celebrado onte no Palau da Música de Barcelona, ante centos de invitados e coa asistencia de responsables das distintas administracións públicas, universidades e organizacións sociais.

A Fundación Avedis Donabedian, fundada no ano 1989 como entidade sen ánimo de lucro, ten como obxectivo colaborar coas organizacións cidadáns e profesionais e as institucións públicas e privadas para mellorar a calidade dos servizos sanitarios e sociais que reciben os cidadáns.

Os seus galardóns anuais premian a aquelas institucións, de diferentes ámbitos, que conten cun plan de calidade orientado á excelencia e que poidan amosar os resultados conseguidos na mellora da asistencia e a satisfacción dos usuarios.

Calidade da Atención Primaria na EOXI de Pontevedra e O Salnés

O premio recibido onte en Barcelona recoñece o control da calidade na xestión e a organización da Atención Primaria, dentro da estrutura de Xestión Integrada de Pontevedra e O Salnés. Este modelo organizativo facilita unha continuidade entre os niveis asistenciais, coa implantación de procesos coordinados nos centros de saúde e nos hospitais do área, que permiten mellorar a calidade da atención e a accesibilidade dá poboación ás prestacións sanitarias públicas.

A integración dos niveis asistenciais na área sanitaria de Pontevedra e O Salnés realízase, fundamentalmente, a través da participación conxunta dos profesionais tanto de Atención Primaria como de Atención Especializada, na elaboración de procesos e protocolos comúns. Isto permitiu o desenvolvemento de programas conxuntos, con forte implantación en toda a área e que supoñen importantes vantaxes para os pacientes.

Entre estes procesos destacan as vías rápidas de atención ao cancro, os protocolos comúns para a atención e seguimento de diversas patoloxías, o incremento da telemedicina, a petición electrónica de analíticas desde os centros de saúde e o acceso directo a probas diagnósticas entre Atención Primaria e Atención Especializada.

Nos centros de saúde da EOXI de Pontevedra e O Salnés – que prestan atención sanitaria pública a preto de 300.000 persoas- xa funcionan vías rápidas para os procesos oncolóxicos máis frecuentes que, en coordinación cos especialistas hospitalarios, permiten diagnosticar e atender ao paciente con sospeita de padecer cancro nun prazo inferior a unha semana.

As consultas de telemedicina postas en marcha nesta área sanitaria permiten aos facultativos de Atención Primaria enviar telemáticamente imaxes de alta resolución e efectuar interconsultas en tempo real cos especialistas do Complexo Hospitalario Universitario de Pontevedra e do Hospital do Salnés, sen necesidade de desprazamento dos pacientes.

Seguridade clínica e asesoría en feridas

Os procesos para controlar e garantir a seguridade clínica son aplicados e compartidos nos centros de saúde e nos hospitais da área, que tamén dispón dunha unidade de asesoría en feridas, pioneira en Galicia, integrada por persoal de enfermería especializado no abordaxe e tratamento de todo tipo de úlceras, que encárgase de canalizar as peticións de asesoramento e formación nesta materia dos profesionais sanitarios de Pontevedra e O Salnés.

Este área sanitaria tamén foi piloto na implantación do programa Conecta 72, no que o persoal de enfermaría dos centros de saúde realiza o seguimento dos pacientes 72 horas despois de que reciban a alta hospitalaria, permitindo mellorar a calidade asistencial e aumentando a relación entre pacientes e profesionais, ademais de axilizar e facilitar a integración e continuidade nos coidados dos pacientes.

Así mesmo, funcionan diversos programas asistenciais integrados, entre os que destacan o de atención á dor crónico non oncolóxico, ás lumbalxias, a patoloxía venosa crónica, as dispepsias, aos pólipos colorrectales ou a patoloxía osteomuscular, e tamén os que promoven hábitos de vida saudable.

A extensión dos controis do anticoagulante Sintrom nos 45 centros de saúde da EOXI de Pontevedra e O Salnés permite a moitos pacientes facer o seguimento deste tratamento no seu propio centro de saúde, sen necesidade de desprazarse ao hospital. Do mesmo xeito, a petición electrónica de analíticas desde os centros de saúde e o acceso directo a probas diagnósticas entre Atención Primaria e Atención Especializada, permite a eliminación do papel e facilita de xeito considerable a accesibilidade dos pacientes a estas prestacións.

Esta flexibilidade na asistencia, independentemente do nivel, xunto coa participación dos profesionais no deseño e a implantación de novos programas asistenciais integrados, que permiten a mellora continua na atención ao paciente e facilitan a súa accesibilidade ás prestacións sanitarias, foron claves para a obtención do premio outorgado pola Fundación Avedis Donabedian.