Un grupo de veciños da parroquia de Mos escenifican un Belén vivente
Os veciños da parroquia de Mos, en colaboración coa Fundación Pazo de Mos, organizan para o vindeiro venres 25 de decembro, día de Nadal, un Belén vivente que representará a escena bíblica do portal no que se produciu o nacemento de Xesús.
Esta escenificación terá lugar dende as 11.00 horas ata as 13.00 horas no Pazo de Mos, e ao remate, actuará a Rondalla do Círculo Cultural e Deportivo Santa Eulalia de Mos.
Así mesmo, oficiarase a Misa ás 12.30 horas na Igrexa de Santa Eulalia de Mos, durante a que os cativos da parroquia cantarán panxoliñas.
Todos os veciños e veciñas implicados nesta iniciativa amósanse orgullosos da súa participación no evento e esperan que atraia a un gran número de visitantes.