Última semana para comprar as entradas do Rio Natura Monbus Obradoiro – Real Madrid

Achégase o día…O día da ilusión, dos sorrisos nerviosos. En soidade, con familiares, con amigos, con novos coñecidos…O día no que poucos se atreven a dicir en voz alta que o ven probable, pero todos o saben no seu corazón. Achégase o día ante o que todos nos facemos propósitos, apostas, promesas, ofrendas…

“22 de decembro de 2015: E ti, Que farías?”

Cóntanolo en redes co hashtag #etiquefarías. A resposta máis orixinal leva dúas entradas para o primeiro partido en Sar do 2016, fronte a MoraBanc Andorra.

E é que, comeza a recta final para comprar entradas para o Rio Natura Monbus Obradoiro – Real Madrid que se xogará o 22 de decembro ás 19.30 horas, mesmo día que o Sorteo Nacional de Lotaría de Nadal.

Os prezos son de 75 euros en Tribunas Retráctiles, 59 euros en Tribunas 1, 45 euros en Tribunas 2, 39 euros en Fondos. As entradas pódense adquirir tanto mediante a páxina web do club como en oficinas, de luns a venres de 10.00 a 14.00 e de 16.00 a 20.00 horas.