Patronal e sindicatos asinan o convenio do Metal de Pontevedra

Sinatura do convenio

As organizacións empresariais do sector metalúrxico de Pontevedra e os sindicatos CC OO e UGT escenificaron este mércores o acordo para o novo convenio colectivo provincial, coa sinatura do pacto nun hotel da cidade de Vigo. Ambas as dúas partes mostraron a súa satisfacción pola rúbrica do novo marco de relacións laborais neste sector, e destacaron que, coa incorporación de cláusulas novidosas relativas á competitividade e á loita contra a competencia desleal, o acordo está chamado a ser un “referente” para o resto de Galicia e do Estado.

O voceiro dos empresarios, Enrique Mallón, recoñeceu que o novo convenio non deixa “totalmente satisfeitas” a ningunha das dúas partes, pero destacou os avances en materias como os contratos de formación, a competitividade, as melloras sociais e o incremento dos salarios.

O representante de CC OO, Ramón Sarmiento, recalcou que este mércores “é un día importante para os traballadores e para a negociación colectiva”, porque o novo convenio achegará “estabilidade” e mecanismos para mellorar a calidade do emprego no Metal.

Non obstante, Sarmiento lamentou que a CIG (coa maioría de delegados no sector) e a organización empresarial Foncalor non quixeran subscribir este convenio, e pediulles que valoren con rigor a conveniencia de sumarse a este amplo consenso” para que as relacións laborais no Metal “volvan á normalidade”.

“ACTO DE RESPONSABILIDADE”

Finalmente, a voceiro de UGT, Ana Belén Valiño, recalcou o “acto de responsabilidade” que supón a sinatura do convenio do Metal de Pontevedra, xa que o acordo axudará “na recuperación económica” da provincia e de Galicia.

Así mesmo, subliñou a importancia das cláusulas sobre a competencia desleal, porque “se detectaron empresas que usan contratos case en fraude de lei”. “Tamén é fundamental a formación dos traballadores e a inversión en bens de equipo e I+D+i para que as empresas sexan competitivas”, engadiu.

NOVO CONVENIO

O novo convenio, acordado polas partes fai algo máis de dúas semanas, ten dous anos de vixencia (2015 e 2016) e contempla un incremento salarial para este ano, con carácter retroactivo, do 0,5 por cento; e do 1,25 por cento no ano 2016.

Así mesmo, tamén reflicte a inclusión da enfermidade laboral dentro do seguro do convenio colectivo, acumulación do permiso do lactación, cláusulas sobre competitividade e loita contra a competencia desleal, ou o compromiso de crear un grupo de traballo para avanzar na clasificación profesional.