Pastor pide a Caballero garantías, certezas e seguridade xurídica para o centro Vialia

A ministra de Fomento e cabeza de lista do PP por Pontevedra, Ana Pastor, reclamou ao alcalde de Vigo, Abel Caballero, que, tras a anulación do Plan Xeral de Ordenación Municipal (PXOM), dea “garantías e certezas” e unha solución con “seguridade xurídica” para poder levar a cabo o centro Vialia na estación ferroviaria de Vigo-Urzáiz.

Así se pronunciou ao ser cuestionada polos xornalistas durante unha visita este luns ao centro de negocios da Zona Franca de Vigo en Porto do Molle (Nigrán), onde Pastor indicou que aínda non mantivo conversacións co rexedor olívico, aínda que ratificou a súa intención de exporlle estas cuestións.

Tal e como adiantara Pastor este domingo despois dunha reunión con directivos de Adif para abordar diferentes temas relacionados coa estación, o Ministerio demanda unha reunión urxente co alcalde vigués para analizar as “tres posibles alternativas” que os técnicos barallan para o proxecto da estación de Urzáiz.

Con iso, comunicou este luns, búscase dar “solución ao problema tan grave” derivado da anulación da PXOM por parte do Tribunal Supremo (TS), especialmente no relativo á área comercial e de esparexemento Vialia, que é “un proxecto de máis de 100 millóns de euros”.

“Están a chamarnos os investidores que se ían a presentar ao concurso. Queren que lles deamos unhas garantías, e para iso voulle a pedir ao alcalde de Vigo garantías e certezas”, concluíu.

TRES OPCIÓNS

A ministra explicou este domingo que os técnicos están a valorar tres posibles alternativas, onde a primeira pasa por “lograr ter, a través do plan do ano 1993, o desenvolvemento dun plan especial” para que se demorase o menos posible” dado que “o prazo de presentación de ofertas é en marzo”.

Así mesmo, especificou que a segunda opción é “considerar un proxecto supramunicipal xunto coa estación de autobuses”, mentres que a terceira consiste en “levar adiante o plan conforme estaba o que foi tombado”.