Os feirantes de Bouzas e Coia irrompen no pleno de Vigo para pedir a reapertura dos mercadillos

Protesta dos feirantes

Un grupo de vendedores ambulantes dos mercadillos de Bouzas e Coia irrompeu este luns no pleno do Concello de Vigo con carteis reivindicativos reclamando a reapertura destas feiras. Os feirantes pediron que se renove esta actividade, despois dun mes e medio sen mercadillos, e lembraron que “hai 180 familias que non teñen para comer” se non poden exercer a súa actividade nestas feiras.

Os vendedores mostraron pancartas pedindo que se abran as feiras de Bouzas e Coia, e pediron ao goberno local que siga o exemplo doutros concellos, que permitiron a celebración dos mercadillos con medidas adicionais de seguridade.

Tras a protesta no salón de plenos, os feirantes continuaron as súas reivindicacións cunha concentración na Praza do Rei, ao berro de “Señor Caballero, queremos solución!”.