O tráfico de mercadorías no Porto de Vigo medrou un 6,93% durante os once primeiros meses do ano

O tráfico de mercadorías no Porto de Vigo continúa pola senda do crecemento, ao rexistrar até o pasado mes de novembro, unha subida do  +6,93% en comparación co mesmo período do exercicio anterior. Así o confirmou esta mañá, en rolda de prensa, o Presidente da Autoridade Portuaria de Vigo, Enrique César López Veiga, tras a reunión ordinaria do Consello de Administración da institución olívica.

Segundo informou, destaca o incremento ‘espectacular’ en mercadorías como a lousa (+123,5%), os automóbiles (+4,23%), o granito elaborado (+5,40%), o granito en bruto (+13,96%), os produtos químicos (+76,99%) e as conservas (+27,18%), entre outras. Pola contra, baixa a pesca conxelada, que se sitúa nun -3,95%. No entanto, e a pesar desta baixada, trátase dunha das mercadorías que máis achega en volume de descargas,  con máis de 616.000 toneladas movidas até o pasado mes de novembro.   

Por outra banda, López Veiga referiuse aos datos rexistrados de buques que, segundo aclarou, tamén evolucionan, presentando uns datos de crecemento en número, pasando de 1.492 (ano 2014) a 1.565 (ano 2015), mentres que os GTS se incrementan nun +12,68%, na comparativa dos once primeiros meses do ano. 

Plan de Empresa 2016

O máximo responsable portuario informou, así mesmo, ao Consello de Administración da aprobación do Plan de Empresa do Porto de Vigo para o ano 2016. Un documento que foi acordado conxuntamente con Portos do Estado e pechouse definitivamente coa incorporación dos acordos adoptados polo Comité de Distribución dos Fondos de Compensación Interportuarios na reunión celebrada fai escasos días en Madrid. 

Segundo avanzou López Veiga, o Plan de Empresa contempla o inicio da redacción dun novo Plan Especial, así como a mellora do acceso ferroviario á Terminal Ro-Ro de Bouzas, cuxo estudo xa foi licitado. 

Así mesmo, no capítulo de investimentos, a Autoridade Portuaria de Vigo contempla diversas actuacións na PLISAN, principalmente a obra de sistemas xerais, as ETAP e a EDAR, e o inicio da urbanización interna.Tamén neste apartado estudarase a conexión ferroviaria co coñecido como ‘Porto Seco’ de Salvaterra-As Neves. Segundo aclarou o Presidente portuario ‘a PLISAN arrinca en firme’ e mostra diso é o acordo por parte dos promotores por ofrecer o chan a un ‘prezo competitivo’ para iniciar a súa comercialización, tal e como decidiron na súa última reunión, celebrada en Vigo a semana pasada. 

Por último, López Veiga informou da aprobación do Plan de Recepción e Manipulación de Refugallos no Porto de Vigo, cumprindo así co especificado na Lei de Portos (RD Lexislativo 2/2011), onde se indica que este plan debe renovarse cada tres anos.  

Devandito Plan conta co informe favorable de Capitanía Marítima e de Portos do Estado e,  actualmente, hai dúas empresas autorizadas para a realización deste servizo portuario.