O Sergas anuncia a redución nas tarifas do parking do Hospital Álvaro Cunqueiro

O Servizo Galego de Saúde (Sergas) chegou a un acordo coa concesionaria para abaratar as tarifas do aparcamento do Hospital Álvaro Cunqueiro (HAC), de maneira que será “máis barato” que calquera dos parkings de concesión municipal de Vigo.

Segundo comunicou a Consellería de Sanidade, o acordo coa UTE permite reducir a un máximo de oito euros a tarifa diaria. Así mesmo, a primeira media hora de aparcamento será gratis, a segunda media hora custará 0,90 euros e, as horas seguintes, un euro.

Por outra banda, a tarifa máxima diaria no aparcamento de Urxencias redúcese á metade, e pasa de 20 a 10 euros. Estes prezos entran en vigor este martes, tal e como anunciou o Sergas, e inclúen un bono mensual para traballadores por 30 euros (inicialmente era de 40 euros).

Sanidade recalcou que esta rebaixa supón que o aparcamento do HAC ten tarifas inferiores aos aparcamentos concesionados polo Concello, os prezos do cal superan, nalgúns casos, os 2,20 euros por hora e os 25,30 euros por día.

“Deste modo, mellórase notablemente a accesibilidade de pacientes, profesionais e visitas ao Hospital Álvaro Cunqueiro”, sostén a Consellería de Sanidade, que tamén anunciou que “se consolida a dispoñibilidade de 180 prazas en exterior, totalmente gratuítas, situadas en balsa onde estaban anteriormente os taxis”.