O mércores será o último día para inscribirse na Ludoteca de Nadal en Vilagarcía

A Concellería de Xuventude lembra que o mércores, 9 de decembro, remata o prazo de inscrición na Ludoteca de Nadal para nenos de 3 a 7 anos. O departamento que dirixe Sonia Outón oferta 30 prazas para esta actividade de carácter gratuíto que se presenta como medida de conciliación para as familias e como alternativa socio educativa e de ocio para os cativos.

Os destinatarios da Ludoteca de Nadal son nenos e nenas empadroados en Vilagarcía nados entre o 1 de xaneiro de 2008 e o 31 de decembro de 2012. O servizo desenvolverase polas mañás no ximnasio do CEIP da Escardia os días 21, 22, 23, 24, 28, 29, 30 e 31 de decembro e os días 4 e 5 de xaneiro, en horario de 9 a 14 horas. As actividades a desenvolver inclúen obradoiros artístico-creativos, manualidades, xogos guiados e libres. Ao tratarse dun servizo que ten unha finalidade conciliadora, o período de chegada e recollida dos nenos flexibilízase a efectos de que as familias poidan adaptados mellor aos horarios laborais dos proxenitores. Así, o horario de entrada será de 9 a 9:15 horas e o de saída de 13:45 a 14.

Os interesados dispoñen de prazo o mércores 9 para realizar a inscrición, para o cal deberán dirixirse ao Rexistro Xeral do Concello de luns a venres de 8.30 a 14.30 horas e de 17 a 20 horas; e os sábados de 10 a 13 horas. De rexistrarse máis solicitudes que número de prazas ofertadas, estas cubriranse mediante un sistema de sorteo a efectos de que todos os cativos teñan as mesmas posibilidades de acceso.

As familias interesadas poden consultar as bases da Ludoteca de Nadal no taboleiro de anuncios da web municipal, dende onde tamén poderán imprimir a solicitude de inscrición.