O menor que agrediu a Rajoy en Pontevedra xa ingresou nun centro de menores da Xunta

O conselleiro de Política Social, José Manuel Rey Varela, asegurou que o mozo que agrediu ao presidente do Goberno, Mariano Rajoy, durante un paseo electoral por Pontevedra o pasado mércores “xa ingresou” este xoves nun dos centros de menores da Xunta, aínda que non quixo precisar en cal deles.

O político ferrolán lembrou, a preguntas dos medios, que “o que fai a Xunta é seguir as directrices que lle marca o xulgado e a Fiscalía de Galicia” neste caso.

A Xunta, a través da Consellería de Política Social, “ten as competencias en materia de infancia e de menores”, indicou Rey Varela, polo que “existen unha serie de centros en toda a Comunidade de internamento, precisamente para situacións xudiciais, tal e como foi este caso”.