O grupo socialista alerta contra a vitoria do Partido Popular

O PSdeG advertiu este luns de que unha eventual vitoria do PP nas urnas o vindeiro domingo suporá “máis perda de tempo” para a estación intermodal de Santiago, que xa acumula “seis anos de atraso” na súa construción. Dixérono, en declaracións aos medios nunha visita á estación de tren acompañados de varios representantes da asociación de veciños de Pontepedriña, a cabeza de cartel ao Congreso pola provincia da Coruña, Pilar Cancela, e o portavoz socialista no Concello de Santiago, Paco Reyes.

En primeiro termo, Cancela destacou a aposta do seu partido pola intermodalidade, tanto a fin de “optimizar” a distribución de persoas e mercadorías como de “aforrar” combustible e de “coidar” o medio ambiente, e defendeu que Compostela se merece” unha estación intermodal como a exposta inicialmente. “Non sabemos por que ese proxecto se devaluou”, lamentou.

Respecto diso, Paco Reyes culpou ao PP de “boicotear” a intermodal da capital galega e sumouse a Cancela ao remarcar que os socialistas descoñecen “cando se tomou a decisión de cambiar” o proxecto que gañara o concurso.

En concreto, explicou que esa versión prevía situar a estación de autobuses na nave situada á beira da actual parada do ferrocarril, de modo que o concello expropiou eses terreos e púxoos a disposición para que se executasen as obras.

SÓ O CONCELLO “CUMPRIU”

Xunto con iso, reivindicou que o consistorio xa acometeu tamén “os cambios necesarios” no plan para acoller a intermodal, de modo que se trata “da única administración” das implicadas -coa Xunta, o ADIF e o Ministerio de Fomento- no proxecto que “cumpriu”.

“Que o teña claro Feijóo”, replicou ao máximo mandatario autonómico, despois de que este aseverase a semana pasada que o concello ten “obrigacións” que debe “cumprir”. “Que veña a pór deberes cando levamos seis anos de atraso nunha obra esencial para Santiago e para o resto de Galicia é totalmente inadmisible”, salientou Reyes, sen deixar de sinalar que o convenio asinado “non di que o concello teña que financiar as obras da rotonda de acceso”.

“PINZA Á CIDADE” DE NORIEGA CO PP

Así as cousas, expresou as súas “sospeitas” de que se traballa nun novo convenio e dixo que o seu grupo non ten coñecemento diso. “Non aparece nos informes das xuntas de goberno e o señor Hernández (o exalcalde, do PP) non informou á oposición de se cambiara a localización da estación de autobuses”, abundou, e agregou que “Compostela Aberta (o Goberno local) non convocou a comisión de coordinación nin lle deu traslado ao PSOE desa información”.

Neste sentido, Paco Reyes advertiu de que Compostela Aberta “ten que ter moi claro o que pasa cando asume, sen contar coa oposición, as propostas do PP”. “Iso si que é facerlle unha pinza á cidade, e é gravísimo”, sentenciou, aludindo ás críticas que el mesmo recibiu por votar no pleno municipal xunto co PP.

“ELECTORALISMO”

Máis aló diso, criticou o “electoralismo habitual e típico do PP” ao aprobar no último Consello da Xunta a licitación da futura intermodal para Santiago “por segunda vez”.

“Nós apostamos por unha estación intermodal integrada, e rexeitamos claramente a proposta do PP dunha solución por pezas separadas”, incidiu, e sumou a petición de conexión peonil entre o Ensanche e os barrios de Pontepedriña e Brañas do Sar. “É unha necesidade esencial para o desenvolvemento urbanístico da cidade”, recalcou.

“Pedimos a Feijóo que deixe de pór deberes e faga el os que lle tocan”, concluíu Reyes, sen deixar de chamar a atención sobre o “atraso” que se acumulará aos seis anos que xa pasaron “con esa suposta formulación dun novo proxecto e dun novo convenio”.