O goberno de Ames participa nas xornadas “A convivencia responsabilidade de todas e todos” organizadas polo IES do Milladoiro

Esta mañá o alcalde de Ames, José Miñones, o concelleiro de Educación e Cultura, David Santomil, e a concelleira de Servizos Sociais, Luísa Feijóo, participaron nas xornadas “A convivencia responsabilidade de todas e todos. O programa TEI como punto de partida e o traballo en rede como obxectivo/meta/camiño…” postas en marcha polo IES do Milladoiro. A través desta iniciativa desenvólvese o programa de “Titoría entre iguais” (TEI), no cal o alumnado de terceira da ESO exerce de titor do alumnado de  primeiro da ESO que acaba de chegar ao instituto. 

Este martes, 1 de decembro, desenvolveuse a primeira xornada do programa posto en marcha polo IES do Milladoiro “A convivencia responsabilidade de todas e todos. O programa TEI como punto de partida e o traballo en rede como obxectivo/meta/camiño…”. Durante o curso 2015-2016 continúa desenvolvéndose o programa de “Titorías entre iguais” (TEI), no cal o alumnado de terceiro da ESO exerce de titor do alumnado de  primeiro da ESO que acaba de chegar ao instituto. Este programa foi implantado no centro escolar no curso 2014-2015.

Unha das liñas de traballo fundamentais do IES do Milladoiro é a convivencia. Dende este centro de ensino entenden que unha boa convivencia escolar mellora os resultados académicos e produce unha maior satisfacción da comunidade educativa ao mesmo tempo que, a pequena escala, contribúe a mellorar a convivencia na localidade na que o centro desenvolve a súa actividade: O Milladoiro.

Esta é a razón pola que se celebran as “I Xornadas: A convivencia, responsabilidade de todas e todos. O programa TEI como punto de partida e o traballo en Rede como camiño”, que queren ser unha primeira toma de contacto na que coincidan todas aquelas institucións coas que o Instituto xa está a traballar. 

Para elo, o fundador do programa TEI, Andrés González Bellido, profesor do Institut Front Maritim de Barcelona, impartiulle unha sesión de formación ao alumnado de terceiro da ESO denominada Compartindo experiencias, dúbidas,… De seguido, os rapaces e rapazas do grupo C de terceiro da ESO fixéronlle unha entrevista a Andrés González Bellido no salón de actos do instituto. 

A xornada de hoxe finalizou cun encontro entre diferentes institucións á que asistiron o alcalde de Ames, José Miñones, o concelleiro de Educación e Cultura, David Santomil, a concelleira de Servizos Sociais, Luísa Feijóo, o inspector da Consellería de Educación da Xunta de Galicia, Manuel Guerra, o director do IES do Milladoiro, Víctor Santidrián, o fundador do programa TEI, Andrés González, representantes das ANPAS do IES do Milladoiro, unha representante do centro de saúde do Milladoiro, Pilar Pereira, membros do IGAXES3, Carlos Rosón e Ana Martínez, así como representantes da Garda Civil e da Policía Local de Ames.

Nesta xuntanza participaron todas as institucións que traballan habitualmente co IES do Milladoiro co obxectivo de poñer as bases dun espazo de colaboración para compartir informacións e rendabilizar esforzos ao redor do coñecemento das realidades sociais, a prevención e a intervención ante situacións conflitivas.