Enviar a un amigo
Opinar
ImprimirO BNG aproba o orzamento de Pontevedra pola ausencia dun edil do Partido Popular
O goberno local de BNG conseguiu aprobar este luns o orzamento municipal de Pontevedra ante a ausencia dun edil do PP na votación no pleno debido ao seu ingreso hospitalario. O Grupo Municipal do Partido Popular solicitara o pasado venres por escrito o adiamento do pleno por mor da citación médica que acababa de recibir o edil popular César Abal, que lle impediría asistir a esta sesión plenaria, ao implicar o seu ingreso hospitalario para someterse a unha cirurxía menor. Por iso, o PP chegou a pedir ao Bloque que tivese a “cortesía” de levantar a un dos seus edís para equilibrar a votación.
Tanto PP, como PSOE, Marea e Ciudadanos, que suman 13 concelleiros, anunciaran o seu voto en contra do orzamento. Polo que a baixa dun edil da oposición permitiu aos doce edís do BNG aprobar as contas presentadas polo goberno local, ao igualarse o número de concelleiros.
O empate resolveuse co voto de calidade do alcalde, o nacionalista Miguel Anxo Fernández Lores, polo que saíu adiante a súa proposta de 72 millóns de euros para o próximo ano, nuns orzamentos que o concelleiro de Facenda, Raimundo González, considera “expansivos, inversionistas e con contido social”.
“ÉTICA POLÍTICA”
Os populares cualificaron de “ruin e mezquino” o comportamento do BNG durante a votación. O portavoz municipal do PP, Jacobo Moreira, acusou a Lores de “prescindir da ética política” e sinalou que a súa actitude demostra “a agonía política na que están sumidos”.
Pola súa banda, o portavoz do Grupo Socialista, Agustín Fernández, cualificou de “miseria política” a actitude do BNG aproveitando a ausencia dun concelleiro para aprobar este orzamento “en lugar de tentar buscar acordos coa oposición”.
Pola súa banda, o portavoz de Marea Pontevedra, Luís Rei, cualificou os orzamentos de “regresivos e antisociais”. Finalmente, a concelleira de Ciudadanos María Rey xustificou o seu apoio a estes orzamentos porque non contemplan medidas para loitar contra o paro, “principal problema do municipio”, segundo expuxo.
O orzamento aprobado conta con 2,4 millóns de euros destinados á rede sanitaria, máis de 31 millóns para gasto corrente, 11 para investimentos e máis de 20 para persoal.
