Nacho Vegas presentará na Coruña e Santiago as súas ‘Canciones populistas’

A xira de Nacho Vegas para presentar o seu novo EP ‘Canciones populistas’ chegará en febreiro a Galicia, con concertos na Coruña (12 de febreiro, Centro Ágora) e Santiago de Compostela (13 de febreiro, Sala Capitol). Un ano e medio despois do disco ‘Resituación’, Nacho Vegas regresa con ‘Canciones populistas’, un novo EP dedicado á icona do folk estadounidense Phil Ochs e que contén cancións con títulos tan elocuentes como ‘Ámenme soy un liberal’, ‘Canción para la PAH’ e ‘Mi novio es bobo’ (na que arremete con humor contra un votante imaxinario de UPyD).

“Experimentei unha radicalización, non nun discurso máis extremista, senón en ser máis explícito para ir á raíz das cousas”, explica o músico asturiano, quen ademais engade que entre estes cinco novos temas hai algúns “máis solemnes” e outros que, efectivamente, “fan máis uso do sentido do humor”.

“A canción política, sobre todo a da xeración de Woody Guthrie, Pete Seeger e Phil Ochs, usaba moito o sentido do humor fuxindo un pouco do sermón. Utilizaban o humor de maneira moi intelixente para distanciarse e ao final chegar máis ao fondo das cuestións”, expón.

Sobre o contido político de Cancións populistas, explica Nacho Vegas (Xixón, 1974) que “é natural que o clima social e todo o que está a pasar se coe na música”, xa que, ao seu xuízo, “o mínimo é ter unha mirada crítica”. “Eu noto certo medo na música a situarse politicamente, pero a min paréceme algo necesario, dada a situación”, recalca.

Nesta liña, apunta que bota en falta que na música “haxa unha renovación cunha nova escena que veña para contar o que está a pasar e acompañando estes cambios sociais”. E agrega: “Os músicos fomos demasiados pasos detrás dos cambios sociais que se foron dando nos últimos catro anos”.

ELECCIÓNS DO 20-D

“Deberiamos estar preparados para un cambio”, afirma, para despois asegurar que el ten “esperanza e ilusión polo menos para que se poidan dar uns pasos cara a un cambio un pouco máis profundo e estrutural”. “Vou ser optimista por unha vez na miña vida, teño confianza”, resalta, en referencia ás eleccións xerais deste 20 de decembro.

Iso si, apostila ao mesmo tempo: “Tampouco vai ser un cambio dun día para outro, pero si me dá medo que acabe habendo unha maioría absoluta de votos de dereita xuntando os de PP e Cidadáns. E se xa colles os do PSOE nin che conto, sería estar peor que fai catro anos”.

En calquera caso, reitera Nacho Vegas que si ten “ilusión en que sexa o contrario”, aínda que tamén admite que é “un pouco incerto o que vai pasar”. “Xa non está tan claro como pasaba noutras eleccións. Cambiou moito o panorama e vemos partidos que conseguiron tanto e conseguírono con tan pouco…”, reflexiona.

CANCIONES POPULISTAS

Volvendo sobre o contido de Canciones populistas, trátase dun EP curto e heteroxéneo que foi gravado a salto entre Cádiz, Asturies, Madrid, Zaragoza e México DF. Algo que o artista resume así: “Cada canción xurdiu dunha maneira moi particular e ao principiou pensaba que polas xuntas podería dar un resultado un tanto disperso, pero precisamente sendo un EP adquire sentido”.

Así, sobre Canción para la PAH, lembra que xurdiu para apoiar unha acción moi determinada nunha sucursal de Cajastur en Xixón, e agrega que xa que a fixo pensou en “gravala practicamente ese mesmo día”. Ademais, subliña que el vive en Xixón e iso dá certa perspectiva neste tipo de asuntos, pois “alí están moi preto todos os barrios, sexan de clase media ou de clase obreira”.

“Desde que Ada Colau está na política institucional, a PAH perdeu un pouco de visibilidade pero segue habendo desafiuzamentos. Agora xa non vemos a tanta policía pegando patadas na porta porque non lle interesa aos bancos nin a ninguén”, indica.

Isto lévalle a afirmar que “segue habendo moitas familias ás que desahucian e ten que ir a PAH a negociar e a tentar que non abusen delas”. “Os desafiuzamentos seguen sendo un drama do que se fala moito menos do que se debería. Axudar e estar aí, para o meu é algo bastante natural tal e como están as cousas”, conclúe.

PRÓXIMOS CONCERTOS DE NACHO Vegas

18 decembro – Teatro Olimpia – Huesca

19 decembro – Albéniz – Xixón

21 xaneiro – Palau de la Música – Barcelona

23 xaneiro – La Riviera – Madrid

12 febreiro – Centro Ágora – A Coruña

13 febreiro – Sala Capitol – Santiago de Compostela