Ferreiro agradece ás voluntarias e voluntarios “as horas que deixan” para mellorar a actividade dos centros cívicos municipais

Intervención do alcalde da Coruña

O alcalde da Coruña, Xulio Ferreiro, acompañado das concelleiras de Igualdade e Diversidade, Rocío Fraga, Xustiza Social e Coidados, Silvia Cameán, e Participación e Innovación Democrática, Claudia Delso, participou na mañá deste mércores no centro cívico dos Mallos na homenaxe ás voluntarias e voluntarios dos centros cívicos municipais, un acto que, como salientou o rexedor, serve para agradecerlles “o tempo que deixan aquí para axudar nas actividades que se organizan nestes espazos”. “Hoxe facemos recoñecemento desas horas que deixan, para axudar coa programación e as actividades”, sinalou Ferreiro, antes de convidalos “a que sigan colaborando cos centros cívicos” en tarefas como as que veñen a desenvolver xa en áreas como a alfabetización de persoas adultas, o apoio escolar, os clubs de lectura, xadrez, danza, canto, coidados interpersoais ou teatro, e a organización de charlas, conferencias ou rutas urbanas.

Durante o acto, que serviu para poñer en valor o labor solidario do voluntariado no fomento das relacións interpersoais e a integración e no fortalecemento do tecido social, repartíronse agasallos, que consistiron nunhas bandexas feitas no centro ocupacional para persoas con discapacidade intelectual de Pascual Veiga.