Feijóo destaca que Mariano Rajoy foi “moderado e educado” tras o puñazo

O presidente da Xunta, Alberto Núñez Feijóo, asegurou que o que máis lle chamou “a atención” tras o puñazo que recibiu o xefe do Goberno central, Mariano Rajoy, nun paseo electoral en Pontevedra, é a reacción “moderada, educada e tolerante” coa que el respondeu. “Para tela hai que ser moderado e educado”, apostilou.

Na rolda de prensa posterior ao Consello da Xunta, onde foi preguntado en varias ocasións pola agresión ao seu xefe de filas, Feijóo mostrouse admirado pola reacción dun “presidente que en ningún momento perdeu a compostura que se lle require”.

Ao tempo, apelou a seguir a súa recomendación de non extraer “conclusións políticas ou partidistas precipitadas”, xa que corresponde aos investigadores determinar o acontecido.

Con todo, Feijóo advertiu de que “a violencia pola violencia xera violencia” e manifestou o seu desexo de que este tipo de “actitudes violentas” que “nada teñen que ver co pobo galego” nin coa súa “forma de ser” queden como feitos illados e non se repitan.

Engadiu que Rajoy “coñece moi ben” ao seu pobo, “ao conxunto” dos galegos, polo que “excepcións excepcionalísimas” como a que, ao seu xuízo, protagonizou o mozo de 17 anos que agrediu o presidente do Goberno, “non van perturbar a educación e tolerancia” que representa.

CONCLUSIÓNS: QUEN INVESTIGA O CASO

Tras advertir que “a violencia pola violencia xera violencia” e, preguntado acerca de se considera que actitudes como a do socialista Pedro Sánchez no debate poden favorecer este tipo de altercados, se mostrou cauto e se reafirmou en que o que a el “lle interesa” é “a reacción” de Rajoy, que mantivo “a súa presidencia en todos os seus xestos, actitude e comentarios”.

“El é o máis indicado para falar e pediu non extraer conclusións partidistas ou políticas anticipadas”, engadiu, antes de apelar a seguir a recomendación de Rajoy, xa que é á Policía e as autoridades que estudan o caso determinar “o relato das consideracións e do contexto no que se movía este mozo”.

“Imos seguir a recomendación de Rajoy e veremos que nos di a Policía do contexto”, insistiu, para engadir que, malia que nas circunstancias e a que non é doado “ter unha reacción impecable en todos os momentos”, o presidente do Goberno logrouno este mércores.

“Non imos prexulgar nin a facer o que estamos afeitos a sufrir”, insistiu, ao tempo que remarcou que, de haber “algunha relación directa ou indirecta” do mozo con cuestións ou un “signo” de carácter “político”, transcenderá polas investigacións en marcha e non polos cargos populares.

“EDUCADO E CON ENORME SENTIDO DO HUMOR”

Preguntado acerca de se este xoves falou con Rajoy para saber como estaba, respondeu que o deixou “perfectamente ben” na pasada xornada, cando o acompañou no traxecto ata o mitin da Coruña e tamén estivo con el durante e despois do principal acto electoral que o presidente do Goberno protagonizou en Galicia nesta campaña para o 20D.

“Tivemos unha conversación entre dous galegos”, remarcou, sen dar máis detalles e antes de reafirmarse en que “a educación é algo fundamental”.

“Un, ou é educado, ou non o é, e está confirmado que unha das súas virtudes é ser moderado e educado. E engado que cun enorme sentido do humor”, destacou Feijóo, convencido de que esta é unha calidade importante para desempeñar calquera cargo e, sobre todo o seu, como presidente do Goberno.