Controlado un incendio forestal declarado na Merca
O incendio forestal que comezou na tarde do domingo no municipio ourensán da Merca quedou controlado na madrugada deste luns tras calcinar unhas 23 hectáreas. Segundo informou a Consellería do Medio Rural, o lume comezou ás 13,40 horas do domingo na parroquia de Corvillón e quedou controlado ás 4,04 horas deste luns.
As estimacións provisionais apuntadas por Medio Rural sitúan a superficie afectada nas 23 hectáreas, das cales 15 son de monte arboledo e oito rasas. Na extinción deste incendio traballaron tres axentes forestais, oito brigadas, tres motobombas, unha pa e un helicóptero, segundo concretou Medio Rural.