Caballero confirma que priorizará Citroën, Cidade da Xustiza e a estación intermodal tras anularse o PXOM

O alcalde vigués, Abel Caballero, ratificou que, tras a anulación do Plan Xeral de Ordenación Municipal (PXOM) de Vigo, se priorizar “cuestións con importancia capital para resolver de forma inmediata” como son a ampliación de Citroën, a Cidade da Xustiza e a estación intermodal, e asegurou que vai “probable que haxa outras”.

En declaracións aos medios, recordou que este mércores mantivo unha reunión coa conselleira de Medio Beatriz Mato, -á que agradeceu o ton cordial-, na que acordaron coordinarse e ir xuntos para “marcar a senda” a seguir tras a sentenza, a colación do que remarcou que “só pasou un día e medio e xa -teñen- bastante maduras as sendas”.

Así, manifestou que se priorizar Citroën, a Cidade da Xustiza e a estación intermodal, porque son obras cunha “grande urxencia” e a súa paralización “sería un gran retroceso”, e adiantou que non descarta que na lista aparezan “algúns temas adicionais” e que neles se utilicen “mecanismos de acción supramunicipais”.

Sobre isto, aínda que rexeitou dar máis datos para que a primeira en coñecer o estudio -que teñen “case ultimado”.. sexa a conselleira de Medio, comentou que “practicamente está a decisión tomada”, o que podería pasar por declarar estas acometidas como ‘plans e proxectos sectoriais de incidencia supramunicipal’.

De feito, a preguntas dos xornalistas, aclarou que a figura de interese supramunicipal pode ser solicitada o Concello ou pode ser unha declaración da Xunta. “O importante é que acordemos os lugares notables”, sinalou.

Caballero, que avanzou que en próximos días iniciará unha rolda de reunións con colectivos, sindicatos e empresarios para explicarlles a situación, manifestou que fará coa Xunta unha formulación conxunta de medidas de choque e de longo percorrido “para tomar as decisións convenientes e ir pola vía máis breve e máis segura, con seguridade xurídica, transparencia e previsibilidade”.

CORRECCIÓN DE ERROS

Así mesmo, o alcalde comunicou que na mañá deste xoves o Concello presentou ante o Tribunal Supremo (TS) unha solicitude de corrección de erros na sentenza de anulación do PGOM, porque, comentou, baixo o seu punto de vista “a sentenza incorre en erro” ao establecer “que non había présa na actuación da aprobación do plan”.

Segundo explicou, a sentenza di que a inviabilidade de someter o Plan Xeral á Avaliación Ambiental Estratéxica se produciu en marzo de 2008 e o plan non se aprobou ata un ano e catro meses despois, “de onde o tribunal infire que non había moita présa”.

“Pero hai un erro”, aseverou Caballero, “porque o 16 de maio de 2008 se aproba o 99 por cento do plan, e dende a declaración de inviabilidade ata a aprobación do plan pasaron 49 días”. “Carai se había présa e présa, claro que a houbo”, remarcou.

Así as cousas, en relación a esta petición ao TS o rexedor aclarou que a sentenza é firme e esta corrección de erro só é “unha cuestión de forma, non altera a sentenza”. “O que pedimos é que quede constancia da realidade; nós sabemos o que facemos”, concluíu.

CULPABLES

Na liña, Caballero fixo fincapé en que o “erro” no que se fundamenta a sentenza non o cometeu o concello. “A sentenza é contra a Xunta, non contra o concello, é contra unha decisión da autoridade ambiental da Xunta”, recalcou, antes de sinalar que non é “momento de entrar niso”.

De feito, recoñeceu que a Xunta “neste tema está á altura das necesidades e das circunstancias; con seriedade, con rigorosidade, en cooperación” e como a sentenza afecta a Vigo irán xuntos para arranxar o problema.

“Non vexo o mesmo no Partido Popular de Vigo”, criticou, antes de pedir ao grupo municipal dos populares que “cando fagan valoracións políticas recorden que foi o PP de Vigo, a alcaldesa en aquel momento -Corina Porro-, quen pediu” a inviabilidade.

“Parece que o PP de Vigo non o quere entender, porque ademais a sentenza avala o traballo rigoroso e serio do Concello, e o avala expresamente. Neste concello todo se fixo ben, por iso gañamos todos os recursos que tiñan que ver connosco”, subliñou, antes de apuntar: “O Partido Popular sempre enredando na política e nós resolvendo problemas”.