Ábrese a inscrición para o obradoiro de personalización de mochilas en Ames

Repensar as mochilas de algodón de toda a vida, darlles un toque orixinal decorándoas e facéndoas máis persoais, facelo en grupo e coa axuda do colectivo Abrollarela Talleres Colectivos. Eses son os obxectivos do obradoiro de personalización de mochilas, un dos cinco que ofrece a Oficina Municipal de Información Xuvenil (OMIX) aos mozos e mozas de Ames ao longo da programación de Nadal.

A concelleira de Mocidade, Silvia Dapena, explica que “este ano ampliouse a programación para os adolescentes do municipio”. O obradoiro de personalización de mochilas realizarase en dúas quendas, para facilitar á asistencia dos que desexen participar. O luns 21 de decembro, de 11:00 a 12:30 horas, a Casa da Cultura de Bertamiráns acollerá aos rapaces e rapazas da primeira quenda, mentres que o martes, 22 de decembro, o obradoiro impartirase na Casa da Cultura do Milladoiro á mesma hora.

Abrollarela Talleres Colectivos porá todos os materiais: pinturas téxtiles, teas, agullas, pegamento etc., pero os participantes están invitados a aportar calquera cousa que pensen que pode empregarse no obradoiro, como materiais reciclados. Silvia Dapena afirma que outro obxectivo do obradoiro é ”que a creatividade da mocidade saia a relucir” na forma dun obxecto personalizado ou dun senlleiro agasallo de Nadal. 

A inscrición xa se pode realizar e permanecerá aberta até o día previa á actividade, o domingo 20 de decembro, no caso da quenda do luns, e o mesmo luns 21 no caso da quenda do martes. Os interesados deberán rexistrar a súa petición xunto cos seus datos persoais no teléfono da OMIX, 616 083 229, ou enviando un correo electrónico ao enderezo omix@concellodeames.org.