A Guarda celebra un pleno infantil con motivo do día da Constitución

Pleno infantil na Guarda

Esta mañá as cadeiras do Salón de Plenos do Concello da Guarda foron ocupados por uns representantes municipais e un público moi especial. Alumnos e alumnas de 5º de Educación Primaria dos colexios Solanas, San Xerome, Sangriña e Manuel Rodríguez Sinde participaron no pleno organizado pola Concellería de Educación para celebrar o Día da Constitución.

O alcalde da Guarda, Antonio Lomba, foi o encargado de presentar este pleno, destacando o valor de que os nenos e nenas se acheguen ao Concello xa que “esta tamén é a súa casa”.

Neste pleno, os diferentes centros presentaron as súas mocións ó equipo de goberno, formado polos escolares do colexio Solanas, os que, dende a alcaldía propuxeron o regulamento do tráfico na Alameda. 

Os nenos e nenas do centro San Xerome propuxeron a adaptación da piscina municipal, os alumnos e alumnas do CEIP A Sangriña a mellora na rede WIFI na Guarda e pola súa banda, os escolares do CEIP Manuel Rodríguez Sinde propuxeron melloras nas infraestruturas da escola de Música e no pavillón municipal. 

Nos rogos e preguntas os rapaces e rapazas debateron, por exemplo, da oferta cultural para os nenos e nenas ou da mellora do servizo de urxencias. 

Xa son moitos os anos que o Concello da Guarda leva a cabo esta iniciativa para conmemorar o Día da Constitución. O obxectivo é que, ademais de mostrar aos máis pequenos que é e para que sirve a Constitución, con esta actividade os escolares se familiarizan dunha maneira divertida coa política municipal, que é a que máis lles pode afectar. 

O alcalde da Guarda, xunto coa Concelleira de Educación, Elena Baz e a Concelleira de Turismo, Montserrat Magallanes asistiron ao pleno e afirmaron estar moi atentos as propostas para, se se pode, incluílas.