Xefes de servizo do Chuvi expresan a súa perda de confianza no equipo directivo

O Foro de Xefes de Servizo do Complexo Hospitalario Universitario de Vigo (Chuvi) trasladaron ao xerente da súa área sanitaria a través dun escrito a súa “perda de confianza no equipo directivo” e urxe á Consellería de Sanidade medidas para liquidar os “problemas” no Hospital Álvaro Cunqueiro (HAC).

No escrito remitido ao xerente do Chuvi, Félix Rubial, o Foro de Xefes de Servizo subliña que “colaborou en todo momento co máximo compromiso” no “intento de resolver os problemas xurdidos tras a posta en marcha do Hospital Álvaro Cunqueiro e a reordenación da actividade do Hospital Meixoeiro”.

Pero “ante a falta de solucións efectivas aos mesmos por parte da actual dirección da EOXI de Vigo” expresou “a perda de confianza neste equipo directivo”.

Por iso, reclama á Consellería de Sanidade a posta en marcha “de forma inmediata” das “medidas necesarias para liquidalos” e “cumprir cos compromisos adquiridos de mellora asistencial” da área Sanitaria de Vigo.

Precisamente este xoves, ás 12,00 horas o xerente da área sanitaria viguesa, Félix Rubial, ten previsto realizar unha visita interna xunto ao delegado territorial da Xunta en Vigo, Ignacio López-Chaves, ao novo hospital Álvaro Cunqueiro.