Unha muller e dous menores foron evacuados en Vigo por un incendio que queimou a liteira na que durmían os nenos

Unha muller e as súas dúas fillas menores de idade foron evacuadas este venres afectadas por inhalación de fume debido a un incendio rexistrado na súa vivenda en Vigo no que ardeu a liteira na que durmían as dúas nenas, de tres e 13 anos.

Segundo informou o 112 Galicia, os feitos sucederon sobre as 5,00 horas nunha vivenda situada na primeira planta do número 4 da Rúa Loureiro en Vigo, onde o incendio comezou nun enchufe e alcanzou a liteira na que habitualmente dormen as nenas.

No operativo mobilizado participaron técnicos de Urxencias Sanitarias, axentes da Policía Local e efectivos do parque municipal de bombeiros. Unha vez no lugar, o persoal de extinción sufocou o lume, que se iniciou nun enchufe e arrasou por completo, segundo precisaron as mesmas fontes, a liteira na que dormen as menores.

A Policía Local comunicou que a nai, inquilina da vivenda, manifestou que cando se atopaba durmindo, espertou por unha grande humareda procedente do dormitorio das súas dúas fillas, polo que as espertou e as sacou da vivenda inmediatamente.

O 061, segundo indicaron fontes sanitarias, desprazou ao lugar unha ambulancia asistencial que levou ás dúas menores e á muller afectada, R.M.G.S., de 39 anos, ao Hospital Álvaro Cunqueiro de Vigo.