Pilar Cancela recorda que é Ferraz quen ten a competencia no caso do alcalde de Becerreá

A secretaria de organización do PSdeG, Pilar Cancela, recordou que é Ferraz -pola dirección do PSOE- “quen ten a competencia” no caso do alcalde de Becerreá, Manuel Martínez, ao que o grupo provincial socialista na Deputación remitiu por burofax o expediente de expulsión despois de que rexeitase nun pleno unha iniciativa dos seus socios de goberno -o BNG-.

Preguntada polos xornalistas, durante un acto en Santiago, Cancela remitiuse ao dito este luns polo secretario xeral dos socialistas galegos, José Ramón Gómez Besteiro, que acusou a Martínez de “situarse nas antípodas políticas de onde está o PSOE” ao avalar iniciativas do PP.

“Unicamente” engadiu que o expediente está formulado” e que está remitido a Ferraz, que é quen ten a competencia neste caso para tomar unha resolución ao respecto”. “E que cando os prazos que marque o procedemento se cumpran, que é o que se vai facer, evidentemente, para iso os procedementos son garantistas, nese momento saberá a resolución”, apostilou.

Cuestionada acerca de se a saída do rexedor de Becerreá do partido se dá por feito, Cancela limitouse a sinalar que “ese é a formulación que se fai” dende o grupo da Deputación provincial de Lugo” e que “iso é o que o partido vai estudar aplicando as normas estatutarias”. “Será o que se decida baseándose nesas normas estatutarias”, finalizou.