Pasará a disposición xudicial o home que supostamente arroxou á súa parella por unha xanela en Vigo

O home de 62 anos investigado por tirar supostamente á súa parella pola xanela dun terceiro piso nun edificio do barrio vigués do Calvario pasará a disposición do Xulgado de Violencia Sobre a Muller de Vigo á primeira hora deste mércores, segundo comunicou o Tribunal Superior de Xustiza de Galicia (TSXG).

O marido da vítima foi arrestado tras os feitos ocorridos o pasado 29 de outubro, aínda que entón non pasou a disposición xudicial ao ser ingresado na unidade de psiquiatría do Hospital Álvaro Cunqueiro, onde permaneceu en calidade de detido e custodiado por axentes do Corpo Nacional de Policía.

Fontes do TSXG, confirmaron que no xulgado de violencia de xénero de Vigo “non constan denuncias contra o sospeitoso”, aínda que o alcalde olívico, Abel Caballero, informou de que a muller acudiu en varias ocasións aos Servizos de Igualdade e á asistenta social municipal para solicitar axudas de emerxencia e ante a súa situación como vítima de violencia machista.

Segundo relatou o rexedor, aínda que foi trasladada ao centro de emerxencia para mulleres vítimas de violencia de xénero, a vítima negouse a ingresar no centro de emerxencia a pesar dos intentos dos técnicos e da propia concelleira de Benestar Social e chegou a durmir en varios lugares para non ter que volver á súa casa.

FEITOS

O 092 recibiu un aviso sobre as 4,30 horas do 29 de outubro pola aparición no patio interior dun inmoble da rúa Carrizo dunha muller, de nacionalidade portuguesa e 71 anos de idade, que supostamente faleceu tras precipitarse desde un terceiro piso.

Ao chegar á vivenda da falecida os axentes atoparon todo revolto, polo que procederon á detención do marido ante a posibilidade de que se producira un episodio de violencia de xénero. Ao lugar acudiron efectivos de emerxencias sanitarias, pero non puideron facer nada pola muller, que faleceu na ambulancia.