Pasan a disposición xudicial os detidos no operativo antidroga en Ourense

Os 13 detidos no marco do operativo antidroga levado a cabo en Ourense comezaron a comparecer no Xulgado de Instrución Número 1 da cidade tras quedar cinco deles en liberdade o xoves en sede policial, entre eles dous axentes da brigada de Drogas ourensana.

Así o confirmaron fontes policiais, que explicaron que en liberdade quedaron tras prestar declaración en comisaría os dous policías da Comisaría de Ourense arrestados e outras tres persoas, dúas mulleres e un home.

En concreto, catro das oito persoas que permanecían en dependencias policiais pasaron a disposición do Xulgado de Instrución Número 1 de Ourense, que instrúe as dilixencias en relación a esta operación levada a cabo por efectivos da Unidade de Asuntos Internos da Policía Nacional desprazados dende Madrid.

As mesmas fontes policiais indicaron que está previsto que a media mañá sexan postos a disposición do xulgado os outros catro arrestados que están en comisaría. Ademais, as cinco persoas que quedaron en liberdade en sede policial tamén comparecerán en sede xudicial.

DELITOS

O xulgado investiga nesta causa os supostos delitos de tráfico de drogas, omisión de deber de perseguir delitos, falsidade documental e revelación de segredo.

Durante o operativo, producíronse detencións, ademais dos dous axentes adscritos á brigada de Drogas de Ourense, de persoas relacionadas co tráfico de drogas no barrio ourensano de Covadonga, onde se practicaron varias entradas e rexistros, e onde se incautaron substancia estupefaciente.