Partido Popular e Converxencia Galega afirman que coa moción de censura ao PSOE se fixo o mellor para Oia

Converxencia Galega (CG) e o Partido Popular (PP) apuntaron que a moción de censura que apartou os socialistas do goberno do Concello de Oia (Pontevedra) responde á falta de acordo entre o PSOE e CG e afirmaron que, con esta medida, fixeron “o mellor para Oia”.

Así se pronunciaron en declaracións aos medios a nova alcaldesa, Cristina Correa, e o voceiro de Converxencia, Luis Giráldez, tras concluír a sesión plenaria na que prosperou a moción de censura -por seis votos a favor e catro en contra- presentada por estes dous partidos.

Luis Giráldez fixo fincapé en que isto é mostra de “democracia” e, malia que numerosas persoas se concentraron durante o pleno no Concello para mostrar o seu malestar e a súa oposición á moción, recalcou que, ao igual que noutros concellos, “aquí tamén “hai que tolerala”. Ademais, recordou que “Oia son 3.000 e algo de habitantes, non catro”.

O concelleiro manifestou que aínda que eles apoiaron a investidura da socialista Rosa María Otero, en case cinco meses de mandato non les “deu opción” e non conseguiron chegar “a un punto” de acordo. “Apoiámola á alcaldía esperando sempre chegar a un punto de contacto, ela non, e por iso demos este paso”, explicou.

Ademais, sobre as acusacións sobre “maletíns”, o edil volveunas rexeitar e mantivo que o que queren en CG é “traballar polo pobo”. “Estando no goberno imos conseguilo e é o que nos queda estes anos”, comentou, antes de insistir en que os concelleiros de Converxencia están “moi tranquilos” coa súa decisión.

Finalmente, ao ser cuestionado sobre se a renuncia do exalcalde Alejandro Rodríguez como concelleiro tivo relación co seu cambio de postura, Giráldez ratificou que “sempre” dixeron que con el non pactarían “nunca”, pero asegurou que en todo caso a moción xurdiu “pola “situación que se veu vivindo estes cinco meses, e nada máis”.

ACTO DE RESPONSABILIDADE

Pola súa banda, a nova alcaldesa da localidade, Cristina Correa, coincidiu en que despois de cinco meses de mandato socialista “se viu que a alcaldesa non tiña intención de chegar a ningún tipo de acordo co partido que o apoiara na investidura”.

Así mesmo, tal e como mantivo durante o seu discurso no pleno extraordinario, criticou que o goberno do PSOE “non ten capacidade de talante nin consenso” e, como consecuencia, presentar a moción era “un acto de responsabilidade, polo ben dos veciños”.

Precisamente sobre eles, e malia as persoas que protestaron este xoves no Concello, a rexedora resaltou que o apoio que teñen dos veciños “é maioritario”, pero comentou que “os veciños que -lles- apoian non son os que veñen a descualificar”. “Son veciños pacíficos que están na súa casa, que opinan pero estes actos non lles gustan”, concluíu.

ANTECEDENTES

A moción de censura presentada a finais de outubro polo Partido Popular de Oia (Pontevedra) e Converxencia Galega (CG) prosperou este xoves apoiada por maioría absoluta -con seis votos a favor e catro en contra-, co que foi nomeada como nova alcaldesa da localidade a popular Cristina Correa.

Tras coñecerse o rexistro de moción, o secretario xeral do PSdeG da provincia, Santos Héctor, -que estivo presente no pleno deste xoves- cuestionara “quen está detrás desta moción de censura con maletín” e pediu a CG que explique “que lles ofreceu o PP” para querer retirar a unha alcaldesa que eles mesmos apoiaron.

Neste sentido, a xa exalcaldesa, Rosa Otero, indicou que tras as eleccións tiveron varias reunións cos edís de Converxencia para tratar de chegar a acordos e, aínda que “a única condición” que puxo o PSOE era a alcaldía e lles deixaron “elixir as concellarías e mesmo soldos”, “nunca chegaron a pactar nin a chegar a un acordo”.