Os musulmáns xordanos concéntranse para rexeitar o terrorismo

Concentración en Santiago

Un grupo de investigadores xordanos que realizan o doutorado en Santiago de Compostela concentráronse este luns xunto ao resto da comunidade educativa na Praza do Obradoiro para mostrar o seu rexeitamento ao terrorismo.

Durante o minuto de silencio que se gardou en memoria das vítimas dos atentados terroristas perpetrados o pasado venres en París, media ducia de xordanos portaron carteis nos que se podía ler: ‘Somos musulmáns e condenamos o terrorismo’ e ‘Islam é a relixión da paz’.

En declaracións a prensa, Khalid, un xordano de 36 anos que realiza un doutorado de informática na Universidade de Santiago de Compostela (USC), explicou que decidiron unirse a esta concentración para mostrar a súa repulsa aos atentados de París, porque “non teñen relación cos musulmáns”.

Pola súa banda, o reitor da USC, Juan Viaño, explicou que quixeron convocar a “toda a comunidade universitaria” para “mostrar o rexeitamento” a uns atentados que “non se xustifican por ningunha loita e baixo ningunha crenza política ou relixiosa”.

Ao respecto, Viaño reflexionou sobre que “é evidente” que a educación “na tolerancia e os valores de defensa dos dereitos humanos é fundamental” para evitar que se produzan feitos como os do pasado venres.