O PSOE de Lugo nega que Manuel Martínez teña o apoio dos alcaldes da provincia

O voceiro de Grupo Socialista na Deputación de Lugo, Álvaro Santos, negou este venres que o alcalde de Becerreá, Manuel Martínez, teña o apoio dos rexedores do PSOE na provincia.

Díxoo despois de que o primeiro edil de Castroverde, Xosé María Arias, denunciase que o partido non cumpriu con Martínez e solicitase unha nova reunión de todos os alcaldes socialistas da provincia; e de que o rexedor de Navia de Suarna, José Fernández, considerase “inxusta” a súa expulsión do grupo do PSOE na Deputación.

Ao respecto, Santos rebaixou a importancia destas accións e sinalou que Arias “só pide unha reunión para aclarar unhas cuestións”.

EXPEDIENTE DE MARTÍNEZ

Máis alá disto, o deputado socialista pronunciouse sobre a decisión do alcalde de Becerreá de esgotar os prazos para presentar alegacións ao seu expediente de expulsión do grupo socialista tras votar xunto co PP no pleno provincial.

“Martínez marcará os prazos que lle pareza convinte marcar, aínda que non o entendo moito se ten tan claras as alegacións que vai presentar. Non entendo moi ben para que necesita 30 días máis para preparalas, salvo que sexa un oportunismo político que, en todo caso, terá que explicalo el”, xulgou.

Sexa como sexa, opinou que “isto tampouco inflúe demasiado” sobre a resolución do expediente. “Mesmo creo que o mellor para el é resolver a situación canto antes”, proseguiu, posto que “pode ser expulsado definitivamente ou non” mentres que actualmente “está suspendido de todos os seus dereitos como membro do grupo provincial socialista”.