O presidente da Deputación de Ourense defende que non transgrediu o Código Ético

O presidente da Deputación de Ourense, José Manuel Baltar, declarouse “absolutamente seguro” de que non transgrediu o Código Ético da institución e, preguntado acerca de se o pronunciamento do Comité de Ética que se reuniu este xoves podería determinar o seu futuro político, replicou que “o futuro político o marcan as urnas.

A resposta de Baltar, ao que unha muller acusou ante a Fiscalía de ofrecerlle un emprego a cambio de sexo, sobre unha posible infracción do Código Ético foi contundente: “Non en absoluto; eu linme o Código Ético, porque o escribín, dende o principio ata o final”.

Ao tempo, reafirmouse en que “todo isto é cuestións alleas á institución e cada un é libre de marcar a estratexia política que teña que marcar”.

Sobre a petición unánime da oposición ao seu xefe de filas, Alberto Núñez Feijóo, para que o aparte do partido, Baltar replicou que “iso forma parte da política ficción”.

“Dende o minuto un díxenlle ao presidente da Xunta o que lle tiña que dicir, e dende ese momento ata este momento, como dentro de 2 anos, como dentro de 20 ou como dentro de 50 as miñas palabras van ser as mesmas: accións legais nun asunto tan desagradable como este”, reivindicou.

O FUTURO POLÍTICO “MÁRCANO AS URNAS”

Baltar fixo estas declaracións mentres se reunía o Comité de Ética da Deputación para abordar o seu caso e asegurou non ter “comunicación ningunha sobre calquera resolución adoptada.

En relación a que o pronunciamento do devandito Comité de Ética puidese influír sobre o seu futuro político, respondeu que “o futuro político o marcan as urnas”.

Por último, sinalou que o Comité de Ética “é un órgano completamente independentemente, que realiza as súas funcións con absoluta autonomía”. “Reuniuse esta mañá nunha reunión máis das que, imaxínome, leva celebradas dende a implantación do Código Ético nesta Deputación”, resolveu.