O Partido Popular reivindica normalidade na Deputación de Lugo

O vicevoceiro do PP na Deputación de Lugo, Carlos Armesto, descartou este xoves unha moción de censura contra o goberno provincial, que forman socialistas e nacionalistas. “Agora mesmo unha moción de censura non está na nosa cabeza”, subliñou, para reivindicar “unha pincelada de normalidade” no executivo bipartito.

Así manifestouse despois do pleno de organización do mércores en que o alcalde de Becerreá, o socialista Manuel Martínez, votou cos populares rebaixarlles os asesores ao BNG e reducirlle dunha dedicación media aos nacionalistas.

“Moción de censura xa houbo unha, o que hai que poñer é normalidade na institución. O goberno terá que facer o seu traballo, a nós tócanos facer oposición e a partir de aí verase calquera posibilidade de cara ao futuro”, explicou.

Neste sentido, pediu ao goberno bipartito que se “centre” e dea “solución” ás súas diferenzas, a raíz do veto do BNG á entrada de Martínez no goberno provincial e do boicot formulado polo alcalde de Becerreá ás iniciativas do Bloque.

“HAI UN GOBERNO ROTO”

Armesto, tras o pleno do mércores, considerou que “hai un goberno roto, un goberno de dous socios onde unha parte non coincide coa outra e con estes vimbios non se pode facer nada”.

“Vemos un goberno débil, un goberno que se precipitou na moción de censura (presentada o 8 de outubro) co único afán de gañar o goberno e sacar ao PP do goberno, pero que non tiña organizado o seu equipo”, criticou.