O CHUVI ordena a categoría profesional de celador cubrindo as prazas dispoñibles

Unha vez realizado o proceso de traslado e apertura do hospital público Álvaro Cunqueiro, e no marco da nova etapa de axustes do Complexo Hospitalario Universitario de Vigo, vaise levar a cabo unha reordenación laboral na categoría profesional dos celadores.

Así, a dirección de Recursos Humanos da EOXI de Vigo procederá á dar cobertura ás prazas vacantes de celador, normalizando o cadro de persoal con vinculacións de longa duración. Con esta medida, ofértase emprego de maior calidade e estabilidade.

Este proceso divídese en dúas fases. Nunha primeira fase, o próximo día 1 de decembro se cubrirán 40 prazas vacantes deste colectivo; 25 con nomeamentos estatutarios de interinidade, e 15 con nomeamentos de substitución en “prazas reservadas” aos seus titulares por diversas circunstancias legalmente establecidas (que o propietario da mesma teña unha comisión de servizos, por exemplo).

Asunción funcións TIGAS

Nunha segunda fase, co obxecto de dar cumprimento ao acordo para que os celadores realicen as funcións que hoxe en día están desempeñando os TIGAS, se dará cobertura a máis prazas vacantes, entre 25 e 30.

No momento actual, estanse analizando as cargas de traballo e necesidades para definir o número exacto de prazas a ocupar, feito que se producirá nas próximas semanas, dado que o prazo acordado para asumir este servizo finaliza o 3 de decembro.