O CD Seixalbo apoia a inclusión social

Moustaphá Mbaye é un mozo de 30 anos de idade. A noite de fin de ano de 2006 pasouna na compaña de máis de cen persoas en mar aberto nunha “pateira”. Foron difíciles días e noites de supervivenza….procedía de Senegal e buscaba cumplir un soño, un mundo mellor. Vicisitudes e o destino levárono dende a illa do Ferro a Santa Cruz de Tenerife, logo cara a península: Madrid, Asturias, Galicia. E por fin Ourense.

A Moustaphá xurdiulle unha familia de acolleita: O club de atletismo de Veteran@s de Ourense; un adestrador humanamente implicado: Carlos Quiroga… e unha nai: Laura.

Esta xornada de liga o CD Seixalbo premia ao clube de Atletismo de Veteranos e Veteranas de Ourense co que se comparten os valores de solidariedade, tolerancia e respecto. E tamén renden unha homenaxe o atleta Moustaphá, que fará o saque de honra do partido, por ser un exemplo de superación, humildade, loita e esforzo.

Co obxecto de aumentar a autoestima de Moustaphà e para demostrarlle o agarimo da afección do CD Seixalbo, durante o encontro da oitava xornada liguera inmortalizarase a este deportista nos muros das instalacións deportivas do Campo de O Carqueixal, da man do prestixioso grafitero Camilo Dasilva.

Atletismo e fútbol unidos. Deporte e integración unidos. O horto humano presente en Seixalbo.