Novo altercado entre vendedores ambulantes na feira de Redondela

Os xitanos ‘zamoranos’ decidiron este venres abandonar a feira de Redondela (Pontevedra) como consecuencia dun altercado co coñecido como clan dos ‘Morones’. Para garantir a súa seguridade, a Policía decidiu escoltar aos primeiros ata os seus domicilios na veciña localidade do Porriño.

Diso deron conta fontes da subdelegación do Goberno en Pontevedra, que detallaron que ese “altercado” se produciu a primeira hora deste venres, cando se instalaban os postos do mercado na alameda de Redondela.

Segundo o relato das mesmas fontes, a Policía houbo de intervir para evitar que se agravase unha discusión entre ‘morones’ e ‘zamoranos’ na que algunhas testemuñas din ter visto “paus e barras”. Con todo, non se produciron detencións, aínda que varias persoas foron identificadas.

Como consecuencia diso, os ‘zamoranos’ optaron por abandonar a feira e volver ás súas casas; e, un pouco máis tarde, os ‘morones’ tomaron a mesma determinación. Á marxe deste conflito, o mercado prosegue “con normalidade” en Redondela, como sinalaron as citadas fontes.