Navantia Ferrol atribúe aos atrasos a destitución do director do proxecto do flotel para Pemex

O presidente do comité de empresa de Navantia Ferrol, Javier Galán (CC.OO.), atribuíu a destitución do xefe do programa de construción do flotel para Pemex aos atrasos que se sucederon na súa construción.

Tras criticar que se decatou desta decisión a través dos medios de comunicación, incidiu en que a destitución dá a razón aos traballadores, que xa o pasado mes de agosto denunciaban “irregularidades na organización e na forma de traballar”.

Neste sentido, destacou que “a pesar de levar o programa construtivo certo atraso con respecto aos prazos, se decidiu mesmo adiantar ata en dous meses a botadura”, unha decisión que considerou unha “irresponsabilidade”, xa que na súa opinión as traballos pendentes son moito máis “complicados entrado o barco a flote que na bancada”.

Dito isto, recriminou á dirección da empresa pública que agora trate de facer “responsables desta situación” os traballadores “tanto da empresa principal coma das auxiliares” e subliñou que a “súa falta de previsión” xa motivou algunhas denuncias.

E é que como remarcou algúns traballadores se viron obrigados a “dobrar quendas, facer horas excesivas extraordinarias e con salarios míseros na industria auxiliar”. Ademais, Galán asegurou que “a día non hai non hai máis de 400 persoas” entre traballadores de Navantia e da industria auxiliar traballando no flotel.

CONDICIÓNS LABORAIS

A liña seguida, Galán trasladou aos medios de comunicación o rexeitamento dos traballadores a que a dirección de Navantia siga aplicando algunhas das modificacións recollidas no IV convenio colectivo, invalidado pola Audiencia Nacional.

“Aínda seguen sin responder como se vai retornar en moitos asuntos ao anterior convenio”, indicou, e citou a obrigatoriedade de realizar un dobre sistema de fichaxe, ademais de 16 horas de exceso de xornada do ano 2014 e o “cartucho” de Nadal, así como as asimilacións, “que supoñen moito diñeiro para os traballadores”.

EÓLICA MARIÑA

Outro asunto que criticou é que se aproveiten estas datas, de precampaña electoral, para “anunciar” novas oportunidades de carga de traballo no ámbito do sector eólico mariño. “Os traballadores non estamos dispostos a que nos sigan tomando o pelo”, advertiu.

Así, indicaron que as súas demandas son que “este sector -en alusión ao naval- sexa declarado como estratéxico tanto en Galicia coma no Estado español”, de modo que se é “necesaria” a diversificación, poidan sentar “nunha mesa para coñecer en que consiste ese termo e que se entende por este”.

NOMEAMENTO

Javier Galán foi elixido o pasado xoves en Madrid máximo responsable da Coordinadora Unitaria de comités de empresa de Navantia, na que están aglutinados todos os centros de traballo e que substitúe ao anterior comité intercentros.

Por maioría, decidiuse que o presidente do comité de empresa de Navantia Ferrol fose tamén o presidente deste órgano de representación social.