Medio Ambiente converterá a paxareira de San Diego nun espazo educativo sobre biodiversidade

A Concellería de Medio Ambiente, dentro das políticas de benestar animal, trasladará mañá as aves da paxareira de San Diego ás instalacións do centro ornitolóxico con fins educativos Avifauna, en Outeiro de Rei. O obxectivo desta actuación, que se desenvolve en coordinación coas Consellerías de Medio Ambiente e Ordenación do Territorio e de Medio Rural, a través da área de inspección veterinaria da delegación provincial na Coruña, é procurar unhas mellores condicións naturais e hixiénicas aos animais que estaban nesta instalación, ao considerar que a súa exhibición na situación na que se atopaban era intolerable para o seu benestar e confort. A antiga paxareira de San Diego pasará a ser empregada con fins educativos sobre biodiversidade e hortos urbanos, como invernadoiro cunha escola de Primaria da zona.

Son, en total, 122 aves, na súa maioría tórtolas diamantes (60), que serán trasladadas ante a delicada situación na que se atopan, tanto de saúde como hixiénicas, xa que, como salienta o departamento municipal, o recinto non cumpría coas condicións mínimas, por haber animais con características terrestres (como os faisáns, perdices de California, colíns de Virxinia, patos… ) convivindo con especies aéreas (ninfas, tórtolas diamantes, tórtolas do Senegal, etc) e tiña ademais problemas con roedores.

En paralelo a este proceso, a Concellería de Medio Ambiente vai colocar nos días vindeiros varios paneis informativos sobre a riqueza ornitolóxica da cidade e con información sobre os mellores lugares desde onde observar aves en liberdade, con ilustracións que permitan a identificación daquelas especies máis comúns no territorio urbano.